Happy for Egypt!

أنا مبسوووووووووووووووووطة أوى يا جماعة انهاردة عشان مصر كسبت الماتش :) و نفسى نكسب كمان أكيد البطولة بس حتى لو مكسبنهاش، هيبقى شىء جميل اننا وصلنا لحد الماتش ده.. صحيح أنا مش مثلاً زى الولاد اللى بيموتوا فى الكورة وعندهم هوس بيها، بس الفكرة برضه انى بحس إن بلدى هي اللى بتلعب.. مش عارفه ليه ناس كتير معندهمش انتماء و لو صغير أوى لبلدهم! و أنا بتكلم عموماً يعنى مش بس فى الكورة أو مصر.. المفروض إن الإنتماء ده غريزة فى كل انسان.. علم النفس بيقول كده.. ان الانسان بيحب يحس دايماً انه منتمى لحاجه.. من أول بيوتنا و عائلتنا إلى بلدنا مثلاً و الوطن أو القارة .. إلخ، ده حتى الواحد لما بيشتغل فى مكان لمدة طويلة بيحس انه زى بيته وبيبقى عنده انتماء شديد.. وأعتقد انه حتى لو الانسان حاسس ان بلده دى مش أحلى بلد فى الدنيا ولا أغنى بلد ولا حتى أنظف بلد.. وبيقول مثلاً: هى البلد دى ادتنى ايه؟؟..أعتقد برضه ان البلد اللى الواحد اتربى فيها و فتح عينيه عليها..لازم يحس بالانتماء ليها..زى مثلاً أهالينا كلنا..محدش مثلاً بيختار والده ووالدته و عيلته، ويمكن مايكونوش أحسن ناس ويمكن حتى يكون على خلاف معاهم فى حاجات كتير، لكن أكيد ليهم فضل عليه فى حاجه

المهم.. مش عايزة أحس انى بكتب درس فى الوطنية يعنى، أنا بس مبسوطة، وبفرح لما بشوف الناس مبسوطة بالشكل ده..تحس الناس ما صدقت تطلع من الهموم الكتير اللى عندها..يا ريت بس ننجز أكتر :)) عالعموم يا جماعة أتمنى للفريق المصرى التوفيق،، واهو الواحد يلاقى حاجة تفرحه! معلش طولت عليكو

يا رب نفضل دايما فارحانين :)